«XXVIIIº PREMI ’D POESÌA»
dedicà a la memòria ’d Pinin Pacòt.
Ël but a l’é col ëd contribuì a alvé ’l ton ëd l’espression poetica arciamandse ai prinsipi detà da Pinin Pacòt e ch’a son ëdcò j’ispirator dij propòsit dël mensil «Piemontèis Ancheuj». Ël tema a l’é lìber

«XVº PREMI ’D PRÒSA»
dedicà a la memòria ’d Nino Autelli.
La propòsta a l’é cola ’d dé në slans a la pròsa poetica dasend apress a la carzà mostrà da Nino Autelli che con soe bele fàule dle virtù paisan-e a resta semper un bel esempi d’ispirassion. Ël tema a l’é lìber.

«II PREMI IJ NÒSTRI»
për ëd poesìe, pròse, mùsica, teatro e via fòrt
St’ann i voroma propon-e costa neuva session con ël but ëd cheuje tute le possìbij forme d’espression. La speransa a l’é cola che slargand ël vantaj ëd jë strument a disposission ëd coj ch’a veulo esprime ij sò sentiment e pensé travajand ansima a n’argoment coma col dël tìtol ch’a veul arciamé d’arcòrd, d’emossion, ëd sensassion, ëd sentiment surtì dal cheur a propòsit ëd përson-e ’mportante për la nòstra vita, bele se a fan nen part ëd la famija. Ël motiv ëd la sernia ’d costa propòsta a l’é che a l’é rëscontrasse ’nt j’ani passà che la partessipassion a la session mach musical a rëscontrava nen un gròss favor. As lassa na pì granda libertà ’d serne cola ch’a l’é la forma pì agradìa e gënita për dësvlupé n’argoment ch’as pensa a peussa esse fàcil për tuti e, al temp midem, a peussa përmëtte ’d conòsse ’d përson-e o ’d sò aspet caràteristich ch’a valo për ël nòstr Piemont.

«PREMI PËR LE SCÒLE»
A l’é motobin agradìa la partessipassion a costa session ëd le scòle ch’a peulo mandé qualsëssìa tipo ’d travaj, individuaj e/o coletiv, ch’a l’abio coma trassa comun-a l’utilisassion d’un-a dle parlade dël Piemont. Ël tema a l’é lìber. «PREMI SPECIAL» Cost premi special «A sorprèisa» a l’é conferì da Michel dij Bonavé për arcordé ij sò ch’a-i son pì nen, ma ch’a l’ha gòj d’arcordé con cost arconossiment ch’a sarà assegnà a n’euvra sernùa fra tute cole ch’a partéssipo ai nòstri concors.

«PREMI SPECIAL»
Cost premi special «A sorprèisa» a l’é conferì da Michel dij Bonavé për arcordé ij sò ch’a-i son pì nen, ma ch’a l’ha gòj d’arcordé con cost arconossiment ch’a sarà assegnà a n’euvra sernùa fra tute cole ch’a partéssipo ai nòstri concors.

REGOLAMENT

Për ij premi «Pinin Pacòt» e «Nino Autelli» as peul concore con nen pì ’d tre poesìe o tre pròse, tute inédite, për un màssim ëd sinch euvre për minca autor. Për le poesìe a venta nen superé ij tranta vers mentre che le pròse a devo nen esse pì longhe ’d tre cartele con caràter 11 e interlinea sempia. Për ël premi «Ij nòstri» ij concorent a peulo partessipé con n’euvra inédita ’d minca sòrt, fra cole segnalà anans, con un màssim ëd doe. Për le poesìe a-i é l’arcomandassion a nen superé ij tranta vers mentre për la pròsa a venta nen superé le tre cartele con caràter 11 e interlinea sempia. Për la mùsica e ’l teatro a-i son nen ëd limitassion ëd longhëssa. Për la mùsica a l’é agradìa, dzorpì dlë spartì, na registrassion (CD, Floppy disk, cassiëtta) dël tòch ësmonù, sòn për facilité ’l giudissi dla Giurìa. J’argoment sernù ’nt le diverse session a dovran esse conform a la moral comun-a e sensa ofende gnun, nì përson-e nì istitussion. Tute j’euvre, meno che la mùsica e ij dissègn originaj ch’a peulo compagné ij travaj ëd le scòle, a dovran rivé an set (7) còpie a:

SEGRETERIA dij CONCORS 2010 «PIEMONTÈIS ANCHEUJ»

Strada Settimo, 92 – 10156 TORINO

Nen pì an là dël 15 dë’Stèmber 2010

Le còpie a devo esse anònime e sensa marche ch’a peusso fé arconòsse ij concorent, mach su un-a a dovrà esse arportà nòm, cognòm, adressa, nùmer telefònich e e-mail ëd l’autor. La grafìa utilisà a dovrà esse cola «stòrica», ciamà ’dcò «piemontèisa moderna» o «dij Brandé». J’euvre mandà a vniran nen restituìe e «Piemontèis Ancheuj» e l’«Armanach dij Brandé» as riservo ògni drit ëd publicassion, ritenendse solevà da qualsëssìa responsabilità o pretèisa da part ëd j’autor o d’àutri. A ògni partessipant (meno che le scòle) a ven ciamà un cotis ëd 15 €, për spèise ’d segreterìa, indipendentement dal nùmer d’euvre mandà. Ij nòm dij component ëd la Giurìa a saran fàit conòsse prima dla sirimònia ’d premiassion; sò giudissi a l’é nen apelàbil.

PREMI

Ij premi ch’a vniran assegnà ai classificà ’nt ij prim tre pòst dij concors «Pinin Pacòt»,«Nino Autelli» e «Ij nòstri» a saran costi:
Al Prim Classificà: 120€
A lë Scond Classificà: 80€
Al Ters Classificà: 50€
Ai prim tre classificà ’d minca concors e a coj ch’a l’avran l’assegnassion ëd le «Segnalassion ëd Mérit» a saran dàite ’d midaje e ’d lìber d’interesse regional. A tuti ij partessipant ëd minca session a sarà consëgnà n’atestà ’d partessipassion su bërgamin-a përsonalisà. Për le scòle a-i saran ëd premi speciaj con ëd lìber për le biblioteche.